పిల్లలతో డ్యాన్స్‌ చేయించండి...!

చదువుల ఒత్తిడి, రుచులకోసం జంక్‌ఫుడ్‌ తీసుకోవడం వంటివే కాదు...శరీరానికి శ్రమ లేకపోయినా పిల్లలు బరువు పెరుగుతారు. అయితే వ్యాయామాన్ని కష్టంగా కాకుండా ఇష్టంగా చేసేలా చేయాలి. అలాంటిదే డ్యాన్స్‌. ముందు దీని ప్రయోజనాలు తెలుసుకుంటే ముందడుగు వేయగలరు.
డ్యాన్స్‌ శరీరాన్ని సులభంగా సాగేలా చేస్తుంది. కండరాలన్నీ సౌకర్యంగా ఉంటాయి డ్యాన్స్‌లోని వివిధ భంగిమల్ని ఒకటికి రెండు సార్లు ఓ క్రమ పద్ధతిలో చేయడం వల్ల కండరాలకు మర్దన ఫలితం అందుతుంది. అందుకే వ్యాయామానికి దూరంగా ఉండే పిల్లలతో డ్యాన్స్‌ చేయించండి. చురుగ్గా
ఉండగలుగుతారు.
* పిల్లలంతా అల్లరి చేయలేరు. కొందరు ఇతరులతో కలవకుండా ముభావంగా ఉండిపోతుంటారు. అలాంటివారితో నృత్యాన్ని సాధన చేయించండి. దీనివల్ల ఇమిడిపోయే తత్వం, సామాజిక చొరవ, సమయ స్ఫూర్తి అలవడతాయట. అంతేకాదు ఎదుటివారి హావభావాలనూ సులువుగా అర్థం చేసుకోగలరు. బరువూ అదుపులోకి వస్తుందంటారు మానసిక నిపుణులు.
* కొందరు చిన్నారులు కాస్త మందకొడిగా ఉంటారు. ఇలాంటివారికి డ్యాన్స్‌ని పరిచయం చేయండి. ఇలా రోజూ అరగంటైనా చేయగలిగితే చాలు మెదడుకి, శరీరానికి మధ్య సమన్వయం అందుతుంది. ఏకాగ్రత పెరుగుతుంది. శరీరానికి శ్రమ పెరిగి ఉల్లాసంగా ఉండగలుగుతారు. ఇలా కనీసం ఇరవై నిమిషాల పాటు చేయగలిగితే మంచిది.