స్ఫూర్తిని నింపిన క్యాడెట్‌!

వాళ్లు పోలీసులు కాదు..ప్రభుత్వ ఉద్యోగులూ కాదు...అయినా గతేడాది కొవిడ్‌ సమయంలో ప్రాణాలకు తెగించి విధులు నిర్వహించారు. కడప జిల్లా, బద్వేలుకు చెందిన ఎన్‌సీసీ అధికారి ప్రియాంక నాయకత్వంలో కరోనా మహమ్మారిని అదుపు చేయడానికి ఈ విద్యార్థులు తమవంతు కృషి చేశారు. అందుకే ప్రియాంక సేవలకు గుర్తింపుగా డైరెక్టర్‌ జనరల్‌ ఎన్‌సీసీ కమెండేషన్‌ కార్డు అవార్డు లభించింది. రెండు తెలుగు రాష్ట్రాల్లో లెఫ్టినెంట్‌ హోదాలో ఈ ఘనత సాధించిన ఏకైక మహిళగా నిలిచారామె.
గతేడాది ఏప్రిల్‌లో కొవిడ్‌ విధుల్లో పాల్గొనడానికి ఆసక్తి ఉన్న విద్యార్థుల పేర్లు ఇవ్వాల్సిందిగా ఎన్‌సీసీ ఉన్నతాధికారులు కోరారు. చాలామంది వ్యాధికి భయపడి వెనుకడుగు వేశారు. అదే సమయంలో బద్వేలులోని రాచపూడి నాగభూషణం డిగ్రీ కళాశాలలో ఎన్‌సీసీ అసోసియేట్‌ అధికారి(ఏఎన్‌వో)గా పనిచేస్తున్న చీదర్ల ప్రియాంక ధైర్యంగా ముందడుగు వేశారు. తన వద్ద శిక్షణ పొందుతున్న 15 మంది విద్యార్థినుల తల్లిదండ్రులను ఒప్పించి వాళ్ల పేర్లను నమోదు చేయించారామె. అలా ఏప్రిల్‌ 19 నుంచి కొవిడ్‌ బారిన పడకుండా జాగ్రత్తలు పాటిస్తూ ఎన్‌సీసీ విద్యార్థినుల బృందం కదన రంగంలోకి దూకింది. స్థానిక పోలీసులకు సహకరిస్తూ 12 రోజులపాటు ఉదయం నుంచి సాయంత్రం వరకు వీరు విధులు నిర్వహించారు. కూరగాయల మార్కెట్లు, రెడ్‌ జోన్‌లు, మెడికల్‌ షాపులు, బారికేడ్ల వద్ద బందోబస్తు ఉన్నారు. పోలీసు వాహనాల్లో తిరుగుతూ మైకుల ద్వారా సూచనలు చేశారు. కొవిడ్‌ విధులతోపాటు మాస్కులు కుట్టి ప్రజలకు ఉచితంగా పంచిపెట్టారు. ప్రజలకు ఉచితంగా నిత్యావసరాలు అందించారు. ఈ బృందంలో స్ఫూర్తి నింపుతూ ప్రియాంక వారిని ముందుండి నడిపించారు. ఎంఎస్సీ చదివారామె. తండ్రి అనారోగ్యంతో మరణించినా తల్లి, నానమ్మల సహకారంతో చదువులో ముందుకుసాగారు. చిన్నప్పటి నుంచీ సేవాభావం ఉన్న ఆమె డిగ్రీ మొదటి సంవత్సరంలో ఎన్‌సీసీలో చేరారు. ఉన్నత విద్య పూర్తిచేసి... తిరిగి తాను చదివిన డిగ్రీ కళాశాలలోనే అధ్యాపకురాలిగా విధులు నిర్వర్తిస్తున్నారు. ఆ తర్వాత అక్కడే 2018లో ఏఎన్‌వోగా పనిచేసే అవకాశం వచ్చింది. ఇప్పటివరకూ సుమారు 100 మంది విద్యార్థినులకు ఎన్‌సీసీలో శిక్షణ ఇచ్చారు. తిరుపతిలోని 5 ఆంధ్రా గర్ల్స్‌ బెటాలియన్‌ ఆధ్వర్యంలో నిర్వహించే ప్రతి కార్యక్రమంలోనూ చురుగ్గా పాల్గొంటారామె. ‘ఎన్‌సీసీలో శిక్షణ పొంది ఉన్నత స్థానాలకు చేరిన సుష్మా స్వరాజ్‌, కిరణ్‌ బేడీ వంటివారే నాకు ఆదర్శం’ అని చెబుతారు ప్రియాంక.

- పత్తెం కిరణ్‌ కుమార్‌, కడప

Tags :