అమ్మాయి మారదా?

మా అమ్మాయికి ఇరవై ఏళ్లు. ఒక్కతే కూతురు కావడంతో అల్లారుముద్దుగా పెంచాం. దాంతో ఇప్పుడు చెప్పిన మాట వినడం లేదు. అన్నీ తనకే తెలుసంటోంది. ఏదైనా చిన్న మాటన్నా నాపైనే అరుస్తోంది? తనని ఎలా మార్చాలి?

- ఓ సోదరి

పిల్లల్ని కొంత వయసు వచ్చే వరకు గారాబంగా పెంచాలి. అయితే ప్రేమతోపాటు క్రమశిక్షణా, సమాజపరంగా ఎలా మెలగాలనే పద్ధతులూ నేర్పాలి. ఇలా చేసినప్పుడే చిన్నప్పటి నుంచే ఇవన్నీ అలవాట్లుగా మారతాయి. అలా కాకుండా పొగడ్తల్లో ముంచెత్తితే చిన్నప్పటి నుంచే వారిలో లేనిపోని దురభిమానం పెరిగిపోతుంది. దాంతో ‘అన్నీ మాకే తెలుసనుకుంటారు. అదే ప్రవర్తనతో పెరుగుతారు. ఈ విధంగా క్రమశిక్షణ లేకుండా పెరిగిన పిల్లలు పెద్దయ్యే క్రమంలో అలా ఉండటం తప్పని తల్లిదండ్రులు చెప్పినా పట్టించుకోరు. తప్పులు చేస్తున్నామని తెలిసి కూడా బుకాయిస్తారు.
పైగా ఈ మధ్యకాలంలో యువత కొత్త విషయాలు ఎప్పటికప్పుడు తెలుసుకుంటూ, సాంకేతికతను అందిపుచ్చుకుంటున్నారు. ఇవన్నీ తమ తల్లిదండ్రులకు తెలియకపోయేసరికి వారిని చులకనగా చూస్తున్నారు. సాంకేతిక మార్పుల్ని నేర్చుకోవడంలో ముందుండే యువత.. సమాజంలో ఎలా మెలగాలి? ఎవరితో ఎలా ప్రవర్తించాలి అనే విషయాల్లో వెనకబడుతున్నారు. టీనేజీ వయసు దాటిన మీ అమ్మాయీ ఈ కోవకే చెందిందని అనిపిస్తోంది. తను మీకు ఎదురు తిరుగుతున్న సందర్భంలో అమ్మాయికి సలహాలిస్తూ అవి ఏవిధంగా పాటించాలో ఉదాహరణలతో చెప్పండి. అప్పుడు తనే నెమ్మదిగా అర్థం చేసుకుంటుంది. అప్పటికీ ఆమె మీ మాటలను, చేతలను ధిక్కరిస్తే మీరు కొన్నాళ్లపాటు ఆమె ప్రవర్తనను పట్టించుకోనట్లు ప్రవర్తించండి. అలా కాకపోతే... స్నేహితులు, బంధువుల్లో ఆమెకిష్టమైన వారితో అర్థమయ్యేలా చెప్పించండి. ఇలా చేస్తే తనలో క్రమంగా మీరు ఆశించిన మార్పు వస్తుంది.