నన్నారికి సై అన్నారు!

నన్నారీ షర్బత్‌... వేసవిలో ఇంతకు మించిన చల్లని పలకరింపు మరొకటి ఉండదేమో! అడవుల్లో పెరిగే ఈ నన్నారీని ప్రత్యేకంగా సాగుచేసి లక్షల్లో సంపాదిస్తున్నారు గిరిజన మహిళలు. కర్నూలు జిల్లాలోని ఛాగలమర్రి మండలం డి.వనిపెంట చెంచు గూడెం మహిళలు సాధించిన విజయం ఇది...
ఇల్లు గడవడానికి భర్తలు కూలి పనికి వెళ్లిపోతే గూడెంలో ఖాళీగా ఉండేవారు ఆ మహిళలంతా. అలా ఉండే బదులు ఏదో ఒక ఉపాధి మార్గాన్ని ఎంచుకుంటే నాలుగు డబ్బులు సంపాదించొచ్చు కదా అనే ఆలోచన వచ్చింది. కానీ వాళ్లకు తెలిసిన పని వ్యవసాయం ఒక్కటే. ప్రకృతి వైపరీత్యాల నడుమ సాధారణ వ్యవసాయం చేయడం కంటే మరో మార్గాన్ని ఎంచుకోవడం మంచిదని అనుకున్నారు. అదే నన్నారి సాగు. అడవుల్లో దొరికే అద్భుతమైన వన మూలిక ‘నన్నారి’. ఈ విత్తనాలని సేకరించి వాటిని సాగు చేసేందుకు నడుంబిగించారు. చెంచు గూడేంలో రెండువేల రూపాయల నోటును చూడటమే గొప్పనుకుంటారు. అలాంటిది ఇప్పుడు వీళ్లంతా లక్షల్లో సంపాదిస్తున్నారు.

నలుగురు నలభైమందయ్యారు...
డి.వనిపెంట చెంచుగూడెం భూముల్లో ఉద్యానవనశాఖ ఇచ్చిన రాయితీతో మామిడి మొక్కల సాగు చేసేవారు కొందరు మహిళలు. వాళ్లే మొదట అంతర పంటగా ఈ నన్నారిని ఎంచుకుంటే బాగుంటుందని ఆలోచించారు. ‘సరసాపరిల్లా’ అనే శాస్త్రీయ నామం కలిగిన నన్నారి నల్లమల దట్టమైన అడవుల్లో మాత్రమే దొరుకుతుంది. సుబ్బలక్ష్మమ్మ, ఇండ్ల పద్మ జ్యోతి, నల్లు రమణమ్మ, దస్తగిరమ్మ అనే నలుగురు మహిళలు భర్తలతో కలిసి అడవుల్లో తిరిగి నన్నారి విత్తనాలు సేకరించి తెచ్చుకున్నారు. ఈ విత్తనాలు నాటి అవి మొక్కలవ్వగానే 30 సెంట్లలో నాటారు. వారు లాభాలను చవిచూస్తుండటంతో మిగిలిన వారికీ ఆసక్తి పెరిగింది. అలా నలుగురు కాస్తా ప్రస్తుతం 40 మంది అయ్యారు వాళ్లంతా ప్రస్తుతం నన్నారిని సాగు చేస్తున్నారు. ఎకరాకు ఆరు నుంచి ఏడు వేల మొక్కలు నాటుతున్నారు. మొదట్లో ఈ నన్నారి సాగులో ఎన్నో అనుమానాలు, వైఫల్యాలు ఎదురయ్యాయి. ఆ అనుమానాలు నివృత్తి చేసుకుంటూ... ఈ సాగుని ప్రస్తుతం పదుల ఎకరాలకు విస్తరించారు వీరంతా. విత్తనం వేసినప్పటి నుంచి పంట చేతికొచ్చే వరకు మొత్తం మహిళలే చూసుకుంటారు.

మూడేళ్లకు రూ.లక్షల్లో ఆదాయం!
నన్నారి ఒక్కో చెట్టు ఒకట్రెండు కిలోల దుంపలని ఇస్తుంది. కిలో రూ.400-700 చొప్పున వేసవిలో వ్యాపారులే గూడేనికి వచ్చి కొనుగోలు చేస్తారు. ఎకరాకు ఆరేడు వేల మొక్కలు నాటినా దాదాపు నాలుగు వేల మొక్కలు బతుకుతాయి. మూడేళ్లకు పంట చేతికొస్తుంది. సరాసరి నాలుగు కేజీల దుంప కిలో రూ.400 అనుకున్నా రూ.16 లక్షల ఆదాయం పొందుతున్నారు. ఇలా రెక్కాడితేకానీ డొక్కాడని కుటుంబాలు కాస్తా లాభాల పంటల్ని పండిస్తున్నాయి.

- సురేంద్ర ఈనాడు, కర్నూలు

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి రుచులు దేవతార్చన

మరిన్ని

రుచులు

App