రూ. మూడువేలతో మొదలై.. మూడు కోట్లకు!

అందరి జీవితాలు ఒకేలా ఉండవు. కొందరిది వడ్డించిన విస్తరైతే.. మరికొందరు గుప్పెడు మెతుకుల కోసం జీవన పోరాటం చేస్తుంటారు. అలాంటివారికి అండగా నిలుస్తోంది ‘శ్రామిక్‌ మహిళా వికాస్‌ సంఘ్‌’.

ముంబయికి చెందిన హిందుమతీ బార్వే, ఉషా మనెరికా, జయశ్రీ సమంత్‌, సుభద్రా కొత్వాలా.. ఈ నలుగురూ కలిసి ‘శ్రామిక్‌ మహిళా వికాస్‌ సంఘ్‌’ను స్థాపించారు. హిందుమతి టీచర్‌కాగా మిగిలిన ముగ్గురూ గృహిణులు. అయితే ఒంటరి, మురికివాడల్లోని మహిళలకు ఉపాధి కల్పించాలనే లక్ష్యమే వీరిని కలిపింది.
అలా మొదలైంది...
ముప్పైఏళ్ల కిందట నలుగురు కలిసి మూడువేల రూపాయలతో క్యాంటీన్‌ మొదలుపెట్టారు. ఏడుగురు మహిళలు వంటచేసి అల్పాదాయ వర్గాలకు భోజనం అందించేవాళ్లు. ఆ తర్వాత నగరంలోని ఆరుచోట్ల స్కూళ్లు, కాలేజీలు, హాస్పిటళ్ల దగ్గర ఇలాంటి క్యాంటీన్‌లను ప్రారంభించారు. ఇప్పుడు సుమారు 175 మంది పనిచేస్తున్నారు. ఏడాదికి రూ.మూడుకోట్ల టర్నోవర్‌ను సాధించారు. మొదట్లో పది రూపాయలకే ప్లేటు భోజనాన్ని అందించేవారు. ఇప్పుడు డెబ్భైమూడు రూపాయలకు చేరింది. ఉదయం ఎనిమిది నుంచి రాత్రి పది వరకు పనిచేస్తుందీ క్యాంటీన్‌. ‘మురికివాడలకు చెందిన ఎంతోమంది మహిళలు పెద్దగా చదువుకోరు. వారికి వంట చేయడం తప్ప మరో పని తెలియదు. కానీ కుటుంబ పరిస్థితుల వల్ల పనిచేసి సంపాదించాల్సి ఉంటుంది. ఇలాంటి వారందరినీ గుర్తించి క్యాంటీన్‌లో ఉపాధి కల్పిస్తున్నాం’ అంటారు వ్యవస్థాపకురాలు జయశ్రీ.

ఇతర సదుపాయాలు కూడా...
ఈ క్యాంటీన్‌లో పనిచేసే మహిళలకు జీతంలోపాటు ఇన్స్యూరెన్స్‌ పాలసీలు, ఉన్నత విద్య, పిల్లల చదువుల కోసం రుణాలు, ఆరోగ్య బీమా, పెన్షన్లు.. లాంటి సదుపాయాలు ఉంటాయి. ఇక్కడ పనిచేసి రిటైర్‌ అయినవాళ్లకు అప్పటివరకూ పొదుపు చేసిన మొత్తాన్ని ఒకేసారి అందిస్తారు. అలాగే ఉద్యోగులను దూర ప్రాంతాలకు పర్యటనలకూ తీసుకెళుతున్నారు. అంటే ప్రముఖ సంస్థలో పనిచేసే ఉద్యోగులు పొందే సదుపాయాలన్నీ ఇక్కడి మహిళలు పొందగలుగుతున్నారు. ‘కొవిడ్‌ సమయంలో ఎన్ని ఆటుపోట్లు ఎదుర్కొన్నా రేట్లు పెంచలేదు. నాణ్యత విషయంలోనూ ఎక్కడా రాజీపడలేదు. అలాగే ఇక్కడ పనిచేసే ఒంటరి మహిళలకు మానసిక స్థైర్యాన్ని అందించడానికి సైకాలజిస్ట్‌ల సహాయమూ తీసుకుంటున్నాం’ అంటారు జయశ్రీ.
సుమిత్రాషింగే పాతికేళ్లకే భర్తను కోల్పోయింది. ఐదేళ్ల కొడుకును పోషించే దారిలేక సతమతమైంది. అప్పుడు ఎవరో ఈ సంస్థ గురించి చెబితే సంప్రదించింది. ఇప్పుడామె తన కాళ్ల మీద తాను నిలబడమే కాకుండా కొడుకును చదివించగలిగింది కూడా. ఇలాంటి మూడు వందల మంది మహిళల జీవితాలకో దారి చూపించిందీ సంస్థ.

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి రుచులు దేవతార్చన

మరిన్ని

రుచులు

App